Bien di, hoi, hello und buenos dias!
I bin d Anna und z Gsicht hinter viver bein. I bin 22ig und studiara Multimedia Production an dr Fachhochschual Graubünda in Chur im 2. Semester. Nebabi schaffi für d Südostschweiz und suedostschweiz.ch sowia für d Social Media Kanäl vur Südostschweiz.
Wia du vlt. schu gmerkt hesch bini waschechti Bündnerin. I kuma vu Chur aber nid vu oba aba. I sega gera und oft „huara“ und wia sichs ghört für a Bündnerin liabi Capuns. Mit Maluns kasch mi aber jaga. Und au wenni öppis mit Multi studiara, würkli multitaskfähig bini nid.
Viver bein isch im Rahma vum Modul „Konvergent Produzieren“ entstanda – kurz Digezz. Digezz isch a Plattform, uf wellera miar üseri Studiaprojekt präsentieren. Aber für mi isch viver bein eba nid nu so es Digezz-Projekt sondern au a Herzensaglegaheit.
I finda, hützutag gnüssen miar alli viel z wenig üsers Leba. I meina miar alli leben nid für immer und söttens in dera Ziit doch eifach guat ha. Drum hani viver bein – dr abits anderi Lebensrotgeber – ins Leba gruafa. I bin selber kei Lebenscoach aber weiss, was miar guat tuat und mis Leba lebenswerter macht. Und das möchti mit dr Welt teila.
Uf viver bein stelli diar drum mini Tipps vor, zum zur Ruah koh, min Liablingsplatz zum Energie tanka oder au Rezept, wo eba nid nu Freud machen bim essa sondern au bim nohmacha 😉 I bin natürlich no am lerna und wit davoh entfernt zum perfekti Fotis d schüssa oder fehlerfreii Text dshriba, aber genau das döff au si und isch au Teil vu viver bein und amna guata Leba. Weil ma muass nid perfekt si, perfekt isch eh langwilig und Fehler sind eifach huara normal und zum lerna do!
Das isch d Istellig woni will vermittla mit viver bein. Do isch ma Willkomma, genau so wia ma isch. Niamert muass, aber sind alli herzlich iglada zum sich inspiriera loh! Wenn i di nu schu abits zum Nohdenka bringa, hani mis Ziel erreicht. Lons mi wüssa, wenn Verbesserigsvorschläg hesch oder inspierendi Ideea für dr Blog.
Meh zum Nama viver bein und alli Inhält findsch uf dr Sita „Blog“. Viel Spass bim Entdecka.
Tschö mit Ö!
Dini Anna